"Carissimi Candidati… statimi a sintiri" di Raimondo Pappalardo

LI CHIAZZI TUTTI CHINI
A GENTI GNUNI GNUNI
I CAFÈ TUTTI PAVATI
PE’ VUTAZIONI RO CUMUNI.

CU PRUMETTI IL CAMBIAMENTO
C’È CU FA A ‘UCI ROSSA
FATTU STA CA DI STU PAISI
N’ARRISTARU MANCU L’OSSA.

VIAGRANDE BEDDA
TISORU DI LI PAISANI
CA A PERIUDU RI ELEZIONI
SI SCIARRIUNU COMU I CANI.

“L’INTERESSE È SULU U PAISI“
DICIUNU TUTTI A VUCI FOTTI
APPOI CU ACCHIANA ACCHIANA
VANU SEMPRI I COSI STOTTI.

CARISSIMI CANDIDATI
STATIMI A SINTIRI
CICCATI D’ARRAGGIUNARI
E DI FARI I COSI SERI.

STRATI CCHIÙ PULITI
U PALAZZETTU PPÌ GHIUCARI
E DAMUCI NA MANU E PUUREDDI
CA NON SANU CHI MANGIARI.

NUDDU VOLI ASSAI
NUDDU VI SPIA A LUNA
PUTTAMU AVANTI STU PAISEDDU
CU LA BINIRIZIONI CA SANTU MAURU NI RUNA.

A MIA NON È NA CRITICA
E MANCU NA PRUVUCAZIONI
MA AGGIUVA SULAMENTI
PI AIUTARI A FARI I COSI BONI.

LU SULU ‘NTIRESSI A’ GHIESSIRI U PAISI
PI VUATRI CANDIDATI
PICCHÌ ‘NTA STU PERIUDU DI CRISI
SEMU ORMAI TUTTI CUNSUMATI.

CUNVINTU DI LA VOSTRA BONA FIRI
E DI LI VOSTRI CAPACITÀ
VI FAZZU LI ME’ AUGURI
E CHIDDI RI TUTTA LA CUMUNITÀ!!!

(Raimondo Pappalardo)